Davao City- Mihilak atubangan sa desk officer sa Sasa PNP ang usa ka ginang kinsa bag-o lang nanganak samtang gisaysay ang pagpangulata sa iyang bana kagabii
Suma ni alyas Joy, 32 anyos nga hubog mipa-uli ang iyang kapikas nga si alyas Richard sa ilang balay sa may Km 10 Sasa alas 11:00 kagabii.
Kalit lamang gisumbag sa suspek ang biktima sa walay igong hinungdan resulta sa black-eye ug bun-og sa kalawasan.
Hagbay ra unta kuno biyaan ni Joy ang iyang bana apan nagluhod-luhod ug pangayo og pasaylo ang suspek nga dili siya biyaan uban sa panaad nga dili na kulatahon ang biktima.
Giangkon pa sa biktima nga nawad-an na kini og gugma sa iyang bana ug wala na kunoy rason aron magpabilin pa og puyo uban sa suspek.
Plano ni alyas Joy nga mupa-uli sa ilang lugar sa South Cotabato gumikan sa kabalaka nga basin madisgrasya pa kini gikan sa kamot ni Richard.
Giasikaso na sa Women And Children Desk sa Sasa PNP ang sumbong sa battered wife.
RadyoMan Joel Viray
