Pasado na sa Committees on Foreign Affairs at Appropriations ang consolidated bill para sa panukalang bagong passport law.
Ayon kay Deputy Speaker at Cagayan de Oro Rep. Rufus Rodriguez, may-akda ng House Bill 6399, papalitan ng panukala ang kasalukuyang batas na Republic Act 9239 o Philippine Passport Act of 1996.
Iginiit ng kongresista na kailangan nang ma-update ang 24 na taon na batas dahil tatlong batas na ang napagtibay ng Kongreso na nakaka-apekto sa “right to travel” kabilang dito ang Domestic Adoption Act of 1998, Citizenship and Reacquisition Act of 2003 at Philippine Identification System Act.
Layunin ng naipasang panukala na i-update at maipakita sa kasalukuyang batas ang mga nakaka-apekto sa pagpoproseso ng pag-iisyu ng passport.
Kabilang sa mga probisyon dito ang itinatatakdang minimum requirements para sa aplikasyon ng passport, grounds at proseso sa denial o revocation ng passport request, uri ng mga pasaporte, validity at pag-iisyu ng travel documents.
Mabibigyan naman ng 50% discount ang mga senior citizens sa pagkuha ng pasaporte at iba pang travel documents.
Sa oras na maisabatas ay mahaharap sa tatlo hanggang 15 taong pagkakakulong at multang ₱15,000 hanggang ₱2 million ang mga lalabag dito habang kung ang offender ay isang public officer ay agad itong tatanggalin sa serbisyo at bawal na itong humawak ng anumang public office.
