CAPIZ – Nagalab-ot na sa 41 ka mga kabarangayan sa probinsya sang Capiz ang lubog sa tubig baha bangud sang malawig nga pag-ulan nga dala sang Bagyong Usman.
Sa ginpagwa nga report sang Provincial Disaster Risk Reduction and Management Office (PDRRMO-Capiz), may 12 ka mga barangay banwa sang Jamindan ang lubog sa tubig baha; 10 sa Mambusao; 4 sa Panit-an; 3 sa Dumalag; 2 sa Sigma; 2 sa Tapaz; 2 sa Dumarao; Dao, Pilar kag Maayon may tig 1 kag ang syudad sang Roxas may 3.
Bangud sang baha, pila ka mga barangay roads ang nagapabilin nga indi maagyan sang mga salakyan. Samtang nagdangat sa 140 ka mga pamilya ang gin-evacuate sa bug-os nga probinsya matapos maapektuhan sang baha.
Ginpahayag ni PDRRMO Head Mrs. Jing Pelaez nga apisar nga naghina kag nangin LPA na lamang ang Tropical Depression nga Usman, nakaalerto na humalin pa kahapon ang mga natungdan nga ahensya sang gobyerno, mga recue and responding units sang probinsya kag ang mga MDRRMO sa mga kabanwahanan.
photo © MDRRM Officer Mr. Antonio Emilio Orocio III
