Davao City – Nagpadayon karon ang Search and Rescue Operations sa Barangay Maa ning syudad human gilampornas sa baha ang maong area kagabii.
Sa exclusive interview sa DXDC RMN Davao kang Barangay Maa Kagawad Lyndon Banzon, udto pa lang kagahapong adlawa (December 23) naghatag na sila og warning sa katawhan nga mo-evacuate apan wala sila giseryoso sa uban.
“Inig gabii na napansin nila nga hinay-hinay nagkataas ang tubig og didto pa sila nag nag-evacuate,” segun ni Banzon.
Ang Maa area usa lamang sa ubay-ubay nga mga kabarangayan nga nahimutang sa may kilid nga bahin sa atong mga kasapaan nga nilapaw ang tubig gumikan sa makusog nga bundak sa ulan didtong dapita sa may bukirang bahin dala gihapon ni bagyong si ‘Vinta.’
Base sa inisyal nila nga report, adunay 400 ka mga pamilya ug 5,400 ka mga indibidwal anaa karon sa evacuation area sa Maa Elementary School.
Nihangyo usab karon og tabang si Banzon ngadto sa mga kaigsoonang Dabawenyong adunay malumong kasingkasing alang sa gamay nga ayuda sa mga nabiktima sa tumang pagbaha.
RadyoMaN Jason Amisola
