Davao City – Gisugdan na sa City Social Services and Development Office (CSSDO) ang pagpang-apod apod og pinansyal nga hinabang ngadto sa mga biktima sa pagbaha nga milampornas sa syudad sa Davao niadtong Agosto 28, 2019.
Kini mao ang gikumpirma ni CSSDO head Ma. Luisa Bermudo kinsa nagkanayon nga sa milabay’ng semana pa kini gisugdan partikukar sa apektadong residente sa Calinan District.
Samtang karong semana lang gitunolan sa CSSDO og cash assistance ang mga hilabihang apektado sa baha sa Talomo District.
Anaa sa P5,000 ngadto sa P10,000 ang madawat sa matag pamilya depende sa damyos sa ilang mga panimalay.
Sa datos sa CSSDO, kapin 13,000 ka mga indibidwal ang apektado sa pagbaha nga dala sa pag-overflow sa kasapaan ngadto sa residential areas.
“We have scheduled the distribution of the cash assistance. The affected families have been fully informed of their schedule,” segun niini.
Kahinumdoman nga giapruba sa lokal nga panggamhanan ang resolusyon sa pagrelease og P50-M isip tabang sa mga biktima ingon man pagpaayos sa mga nadamyos nga imprastraktura dala sa kalamidad.
RadyoMaN Jason Amisola
