Tulo ka mga sundalo nga sakop sa 23rd IB Phil. Army ang nasamdan sa natigayong engkwentro kagahapon tali sa rebelding New Peoples’ Army (NPA) sa utlanan sa Brgy. Tungao ning syudad sa Butuan ug lungsod sa Las Nieves, Agusan del Norte.
Gikompirma ni BGen. Maurito Licudine, Brigade Commander sa 402nd Brigade Phil. Army ang tahu nga adunay nasamdan nga tulo sa tropa sa militar apan nagdumili kini sa pagbutyag sa pangalan ug anaa na sa luwas ang kahimtang nga gitambalan didto sa Cagayan de Oro City.
Padayong gigukod sa kasundaluhan ang sakop sa Guerilla Front Committee 14A nga na-engkwentro sa militar kinsa mikalagiw sa kabukiran human sa bakbakan.
Walay pu-as ang combat military operation sa maong dapit tumong aron hingpit nga mapapas sa mapa ang rebelding NPA nga naglihuk sa bukirang bahin sa Agusan del Norte ug dakbayan sa Butuan.
Apan aminado si BGen. Licudine nga naglisod sa pag-atraka ang tropa sa militar tungod sa mga improvised explosive device (IED) ang gitanom sa lugar.
