Baklanay sa merkado sa banwa sang Murcia may schedule na suno sa Mayor

Ginpangako sang alkalde sang banwa sang Murcia nga indi na masulit ang natabo kahapon (Domingo, April 5) kon diin nag-dugok ang pumuluyo sa merkado sang banwa apesar sang ginapatuman nga Enhanced Community Quarantine.

Sa interview sang DYHB, ginpahayag ni Mayor Gerry Rojas nga gulpi gid lamang kag wala ginapaabot ang pagdagsa sang tawo sa merkado bangud antes pa man ginpatuman ang ECQ nakapagwa na ini sang direktiba nga temporaryo nagapa-untat sang market day sa Murcia nga amo ang adlaw sang Domingo.

Pila sa ginalantaw nga rason ni Rojas kon ngaa natabo ini amo nga posible nalipatan na sang pumuluyo ang information dissemination nahanungod sa pagpaiway sang market day, subong man kahapon nga adlaw amo ang releasing sang 4Ps gani bisan pa nga may instruction na nga ang lider lang ang makuha sa gihapon nagdulhog ang mga pumuluyo kag nagpamalaklon.


Ginklaro ni Rojas nga wala man nagdugay ang amo nga scenario kon diin antes nag las 7 sang aga gilayon nga na-kontrolar ang sitwasyon bangud sa presensya sang police, market guard kag sang miembro sang ila task force.

Angut sini gilayon nga nagpatawag sang meeting si Rojas upod ang PNP kag task force sa diin nakahuman sila sang desisyon nga clustering na lamang ukon by-schedule ang pagpaninda, apat tubtub lima lang ka barangay ang pwede makasulod sa merkado, Lunes tubtub Domingo.

[image: image.png]

Facebook Comments