General Santos City–Midangop sa RMN Gensan ang usa ka inahan human nga matud pa namatay ang iyang duha ka bulan nga anak human nga gibakunahan sa health center sa barangay Kalabanit, Glan, Sarangani Province.
Saysay ni Jocelyn Dampa, inahan ni Princess Kate Dampa, duha ka bulan ang edad nga petsa 21 sa Hunyo dihang ilang gidala sa health center sa ilang Barangay ang iyang anak aron pabakunahan.
Aligasyon sa Ginang nga siya natingala nganong gidungan ug inject ang OPB-1 ug Polio Vaccine sa ilang Midwife nga si Jordan Adajar ngadto sa iyang anak, human niini gipa-inum kini ug tambal sa kalibanga bisan nga wala kini gikalibanga niadtong tungura. Pag-abot sa ilang balay, nagkurog na ang iyang anak ug nagluya.
Hapon sa samang adlaw ilang gidala sa Glan Municipal Hospital ang iyang anak gumikan walay undang ang pagkurog sa lawas niini, apan sila gipapauli tungod sumala pa nurse posibling epekto lang sa bakuna ang pagkurog sa bata.
Buntag niadtong Hunyo 22, dihang ilang gibalik sa ospital si Princess tungod dili na kini mototoy ug luya na usab kaayo ang iyang lawas. Pag abot sa Glan Municipal Hospital sila gibalhin dinhi sa Gensan tungod kritikal na ang kahimtang sa iyang anak.
Hapon sa maong adlaw dihang nakabsan gyud ug kinabuhi ang iyang baby sa Doctors Hospital dinhi sa Gensan. Samtang base usab sa record sa bata gikan sa Doctors Hospital, Meningitis maoy hinungdan sa kamatayon sa bata.
Apan ang inahan nagtuo nga ang dungan pa pag inject ug bakuna sa iyang anak maoy hinungdan nga nakabsan kini ug kinabuhi.
Samtang gisuwayan sa RMN Gensan News Team nga kuhaan ug pahayag ang Midwife sa kalabanit Health Center apan nagdumili kini sa paghatag ug pahayag gumikan anaa na sa Provincial Health office ang maong issue ug aduna na usay gihimong imbistigasyon kalabutan niini.
