Roxas City, Capiz- Ginsulod sang wala makilala nga mga kawatan ang isa poluy-an sa Sitio Cabral Brgy. Dayao, Roxas City. Nakuha sang mga suspek ang pila sa mga kagamitan kag mga gadgets nga yara sa sulod sang balay.
Suno sa pahayag sang biktima nga ginkilala kay “Olivia”, 18-anyos ang pang-edaron, ginkakibot sini sang nagpauli sa ila poluy-an mga takna 11:00 sang gab-i nga naga-ukay na ang mga kagamitan sa sulod sang ila balay.
Sa ginpatigayon nga imbentaryo sang mga kapulisan, nadiskubrehan nga kalakip sa mga gintaban sang kawatan amo ang duha ka netbook nga nagabalor sang P13, 000 kag P10, 000 pesos; laptop nga nagabalor sang P35, 000 pesos; tablet nga nagabalor sang P7, 000 pesos kag hard disk drive nga nagabalor sang P6, 000 pesos.
Blangko pa ang mga otoridad sa identity sang mga suspek nga nag-agi sa nalikod nga porsyon sang amo nga poluy-an pinaagi sa pagkakas sang tatlo ka mga jalousie sa bintana.
