Balay, nasunog sa banwa sang Dumarao; tag-iya, nalakip sa sunog, patay

Dumarao, Capiz – Nasunog ang 48 anyos nga lalaki samtang nagakatulog sa iya kwarto matapos masunog iya balay sa Sitio Kabangahan Daku, Barangay Gibato, Dumarao, Capiz.
Ginkilala ang biktima sa kay John Mark Malones, wala asawa kag nagaisahanon nga nagapuyo sa nasambit nga lugar.
Ba-se sa inisyal nga imbestigasyon sang mga otoridad, hubog sang nagpauli ang biktima kag nagapanigarilyo ini antes nagtulog sa iya balay.
Posible nga natulugan ang biktima kag wala mapatay ang upos sang iya sigarilyo rasun nga nagtuhaw ang kalayo.
Madasig nga naglapta ang kalayo sa hulot sang biktima bangud himo gid lamang sa light materials ang balay.
Bangud wala ini makabatyag nga nagakasunog na ang kwarto, nalakip sa pagkasunog ang biktima nga amo ang gintunaan sang iya nga kamatayon.
Nagalab-ot naman sa P30, 000 ginabulubanta nga kahalitan sang nasambit nga sunog.

(Photo from web)

Facebook Comments