Davao City – Gibatig kahadlok samtang nagpatala sa kuwerpo sa kapulisan kagabii ang usa ka doktor kay duna kunoy multo sulod sa iyang balay sa Barangay Angliongto, Lanang ning siyudad.
Sa Sasa PNP gisaysay ni Dr.Albert De Leon ngadto sa mga puis nga nakugang na lamang siya dihang misugat sa duha niya ka mga mata ang mga dagkong tunob sa mga tiil ug marka sa mga kamot nga milama sa bungbong sa iyang balay sa iyang pag-uli 8:00 kagabii.
Sa unang higayon, matud pa, nagtoo si Dr.De Leon nga basin gisulod og kawatan ang iyang balay samtang walay tawo didto mao nga gisusi niini kung unsay nawala nga mga gamit, apan sa iyang pagsusi nasuta sa doktor nga kumpleto ug walay natandog sa iyang mga gamit ug gani walay nabungkag ni wala maguba ang pultahan sa balay isip timaan nga giransak ang pinuy-anan.
Sa pagtuo nga dili iya sa kawatan ang mao nga mga lama nagsugod na og panglimbawot ang iyang mga balahibo ug didto nagsugod na ang iyang gibati nga kalisang basin dunay multo sulod sa iyang balay. Tungod niini, gilayong nagpatabang sa Sasa PNP ang doktor aron ma-imbistigahan ug maklaro kung iya ba sa kawatan o sa multo ang tunob sa mga tiil ug marka sa mga kamot ang nidikit sa bungbong sa iyang balay.
Kasamang Joel Viray
