Pagadian City – Prisohan ang gitugpahan sa kanhi kapitan kauban ang siyam niya ka mga sakop dihang nakuhaan og daghanang klase sa armas atol sa pagronda sa mga otoridad alas 10:00 kagabii dihang dapita sa Purok 3, Brgy. Bag-ong Valencia, Dumingag, Zamboanga del Sur.
Unang nakadawat og reklamo ang kapulisan gikan kang Barangay Chairman Marcelo Romeo Dalandao nga gi-harass matud pa kini sa armadong kalalaki-an nga sakop ni kanhi kapitan Hermilina Japos Arbilon.
Daling niresponde sa lugar ang tropa sa 902nd Brigade, Regional Mobile Force Battalion 9 ug kapulisan sa lungsod sa Dumingag.
Pag-abot sa kapulisan sa tugkaran sa balay ni kanhi kapitan Arbilon nanibat ang mga sakop niini dihang nakamatikud sa presensya sa otoridad apan largo nga gisulod sa responding team ang balay sa ex-kapitan og nasapnan ang siyam ka mga indibidwal nga sila si Misael Bation, Elmer Mangcao, Jonny Tayong, Leonardo Batoctoy, William Albaira, Leonardo Gupit, Lito Japos, Rico Sauclum ug Joel Baluran.
Nakuha gikan sa balay ni Arbilon ang usa ka unit sa calibre 45 nga pistola nga dunay siyam ka buhing bala, usa ka granada samtang nakumpiska usab gikan sa bodega ang laing usa ka unit sa calibre 45 nga pistola nga dunay siyam ka buhing bala ug usa ka unit sa caliber 38 nga gisukipan sa lima ka buhing bala.
Gipaslak na sa Dumingag Municipal Police Station Detention Cell ang mga dinakpan samtang naghulat sa tukmang kaso nga isang-at batok kanila.
