Pasakaan na ang ginasukot sa mga dog owners dire sa probinsya sang South Cotabato sa tion nga ipaidalom sa registration kag anti-rabies vaccination ang mga ido sang Provincial Veterinary Office matapos nga sang 1999 pa ang P10.00 nga balayran.
Suno kay Dra. Flora Bigot OIC Provincial Veterinarian sang South Cotabato ini agud nga masustain man ang programa sang provincial government sa kampanya kontra rabis.
Base sa naaprobahan nga 2017 Revenue Code sang lokal nga panggobyerno halin sa P10.00 nga balayran mahimo na ini nga P50.00 sa kada ido nga mapaidalom sa registration kag vaccination epektibo sa Abril 1 subong nga tuig.
Ginhatagan pa punto ni Dra. Bigot nga ang nasambit nga veterinary services ang manubo pa kumparar sa iban nga probinsya kapareho na lamang sa Tacurong City nga nagalab-ot gani sa P150.00 ang ila ginasukot sa rabies vaccination.
Samtang sa pamangkot nga posible madamo na gid ang indi makapabakuna tungod magbug-at na sa bulsa suno kay Dra. Bigot dapat hunahunaon na sang nagapanag-iya nga ang kaya lang ang sagudon nga ido.
