Wala nay plano pang mubalik sa nasud Kuwait ang mukabat 260 ka mga OFWs nga gitabangan sa gobyerno sa Pilipinas nga makauli human nakasinati ug pagpang-abuso gikan sa ilang mga amo.
Nasayran nga kaganinang buntag, miabot sa Ninoy Aquino International Airport ang maong mga OFW’s diin sila gisugat ni Overseas Workers Welfare Administration Deputy Administrator Arnel Ignacio. Sakay ang mga nasangpit sa flight PR 669.
Nasayran nga dihang sila gipangutana kung mubalik pa sila sa Kuwait, hugtanong gibutyag sa mga nahisgutan nga dili na nila buot pang mubalik, inay mas pillion pa nilang magpabilin nalang sa sa Pilipinas uban ang ilang pamilya.
Gihatagan ug P5,000 nga financial assistance sa OWWA ang mga nasangpit, samtang P20,000.00 nga livelihood assistance aron nga sila matabangan nga makasugod sa ilang gamayng negosyo.
Samtang gibutyag sab ni TESDA Deputy Director Alvin Feliciano nga siya nakig-alayon na ngadto sa Department of Trade and Industry (DTI) alang sa livelihood training sa mga nasangpit nga OFW’s.
