Davao City – Girekomenda karon sa Department of Health (DOH)-XI nga ipa-demolish ang bomba (pitcher pump) ug balon nga source sa tubig-mainom sa Purok 10, Sitio Balon, Barangay Tigatto, Buhangin, Davao City.
Kini human nga nakumpirmang kontaminado ug dili luwas ang ilang tubig subay sa resulta sa inbestigasyon sa DOH-XI human gikuhaan og sample ug gi-test ang tubig sa lugar.
Sa interbyu sa DXDC RMN Davao kang Barangay Tigatto Kapitan Lito Lapitan gibutyag niini nga aron nga malikayan nga aduna pay mukuha og tubig sa area, girekomenda sa health department nga gubaon o i-demolish nalang ang maong mga man-made water sources.
“Actually ang ilahang (DOH) recommendation, i-demolish gyod ang maong balon o kaya kadtong pitcher pump (bomba) didto kasi basin daw og magsekreto og inom ang mga tao,” matud ni Lapitan.
Gipasabot usab sa barangay kapitan nga wala siyay gahum nga mopa-demolish sa maong man-made water sources diin gipanawagan niini nga mas maayong ang lokal nga gobyerno ang mupatuman niini subay sa rekomendasyon sa DOH-XI.
RadyoMaN Kirby Manzon
