Davao City – Hangtud karon, naglisod ug wala pa’y namugna nga bakuna ang mga bantugan sa medisina aron magsalbar ang mga tawo sa tibuok kalibutan kinsa natakbuyan sa COVID-19.
Sa kakulang sa bakuna, ang community quarantine ang ginagamit nga pamaagi sa daghang kanasuran aron pakigbatukan ang COVID-19.
Matud ni Presidential Commission for the Urban Poor (PCUP) Commissioner Norman Baloro, angay sabton sa tanan nga ang COVID-19 kagaw kini nga dili makita busa ang mga scientists nalisdan karon og himo sa bakuna.
Sa ing-ani nga sitwasyon, ang community quarantine ang epektibong pamaagi aron mapugngan ang ground-level human transmission sa maong balatian.
Gipasabot ni Baloro nga ang community quarantine mao ang pag-isolate sa matag komunidad, pa-instalar ug mga health guidelines and protocol pinaagi sa pagpugong sa unrestricted movement sa tawo.
Apan gumikan sa kagahi og ulo sa ubang Pinoy sa quarantine nga gipatuman sa gobyerno, hayan magpadayon ang kaso sa COVID-19 ug madugay pa ang pagtapos niini nga balatian dinhi sa nasud.
Kumpiyansa si Baloro nga 75% sa mga barangay ning dakbayan andam na kaayo ning pag-imposar ni Mayor Sara Duterte Carpio sa community quarantine sa tibuok syudad.
Ubos sa giluwatang Executive Order No. 20 ni Duterte, gipaubos na sa community quarantine protocol and entero dakbayan sugod ugma March 26, 2020 hangtod April 19, ning tuiga sa gihapon.
RadyoMaN Joel Viray
