Balot vendor patay matapos tiruhon sang iya customer, motibo ginadudahan may kahilabtanan sa druga.

Ginadudahan nga may kahilabtanan sa druga ang isa sa ginalantaw nga motibo sang Koronadal City PNP sa pagluthang patay sa isa ka balot vendor alas 6:35 sang nagligad nga gab-i sa Morales Avenue, Barangay GPS, syudad sang Koronadal.
Pilas sa iban nga parte sang iya kalawasan, tuga sang pagpangluthang ang nagtapos sa kabuhi sang biktima nga ginkilala kay Ronie Baylosis Hagoriles, 43-anyos, balot vendor, residente sang Purok Pantalan, Barangay San Jose sa nasambit nga syudad.
Sa imbestigasyon sang Koronadal City PNP, bag-o lang nag-abot ang biktima sa iya sini pwesto sa diin natabo ang krimen para papanyaponon ang iya sini kabataan, apang isa suno pa ka suspek ang mabakal sang balut, apang hinali na lang nga ginluthang ang biktima sang makapila ka bes nga nangin tunaan sang iya hinali nga kamatayon.
Gilayon suno pa nga nagpalagyo ang suspek sa padulong sa Balmores St sa nasambit nga syudad.
Narekober naman sa gintabuan sang krimen ang duha ka basiyo kag isa ka balinis sang wala natumod nga sahi sang armas luthang.
Kaangot sini ginkumpirmar ni Barangay Kapitan Danilo Simtim sang Barangay San Jose sa nasambit nga syudad nga wala sa ila sini drug watchlist ang biktima kag wala man ini nalakip sa mga drug surenderee sa iya barangay.
Dugang pa ni kapitan Simtim halos tanan nga oras sang biktima yara sa iya pwesto sa diin natabo ang krimen bangud sa iya sini negosyo nga balutan.