Si Councilor Baluran maoy Chairman sa Committee on Transportation sa Konseho ning syudad.
Niini, naglaraw si Konsehal Baluran nga muduol sa City Legal Office aron mangayo og legal nga opinyon kon unsay maayong buhaton aron mahunong na ang pagsuplay og bao-bao sa rason nga liboan na ang mga namasada apan kapin dos mil lang ang dunay prangkisa ug legal nga mamasahero ug dugang pa ang piligro nga hatod niini sa mga pasahero diha sa mga kadalanan.
Giingon ni Baluran nga ang mga Kapitan sa Toril, Mintal, ug Calinan pareho na nagmulo gumikan sa kadaghang mga bao-bao nagabiyahe bisan og ang kadaghanan niini ilegal ang ilang pamasada sanglit wala na’y bakante nga prangkisa mahatag ang City Franchising Regulatory Board ilawom sa buhatan sa City Transport and Traffic Management Office ngadto sa buot mag-aplikar og prangkisa.
Sa karon nga wala pa hingpit ma-undang ang pagpamaligya sa ombak diin nasabutan sa gihimong committee hearing ni Konsehal Baluran mao nga dili baligyan og bao-bao ang bisan kinsang customer kon walay sertipikasyon gikan sa kapitan sa barangay.
Hinuon, aminado ang lokal nga magbabalaud nga gamit kaayo ang ombak sa mga barangay nga kuwang kaayo og mga Public Utility Jeepney (PUJ) sama sa paingon sa mga baragay sa Distrito sa Marilog ug sa uban pang distrito sa dakbayan sa Dabaw.
RadyoMaN Joel Viray
