Davao City – Nabalaka ang Committee on Transportation chairperson sa hawanan sa Konseho sa pagdagsa sa mga pasahero nga wala makasakay ug na-stranded sa mga dalan human walay nagbiyahe nga mga PUJ kagahapong adlawa.
Matud ni Third District Councilor Conrado Baluran, wala niya laumi nga mudagsa ang mga pasahero kagahapon bisan og dili pa unta tanang mga kumpanya ang nagbalik operasyon timing usab nga walay namasada nga mga PUJ resulta nangatanggong na hinoon diha sa mga dalan.
Hinoon, wala mahaya kon sukmati sa Konsehal ang mga PUJ drivers nga wala mubalik sa ilang mga trabaho gumikan sa pila ka bulan nga wala na sila’y sweldo ug naglisod na usab sila sa ilang pagpuyo hatud sa krisis sa COVID-19.
Gipasabot ni Southeastern Mindanao Diversified Drivers & Operators Cooperative President Maning Duran nga wala pa nahuman og proseso ang mga rekwisitos sa LTFRB_XI ang mga operators ug rason nganong walay nagbiyahe kagahapon.
Gikumpirma usab ni Federation of North and South Bound Van Terminal President Romel Bajador nga wala pa sa’y biyahe ang mga van hangtud karon sanglit wala pa sila’y nadawat nga direktiba gikan sa LTFRB_XI nga puwede na silang mamasada.
Gibutyag ni Baluran nga may lakang karon ang City Transport and Traffic Management Office kon CTTMO aron matubag ang kawad-on sa pampublikong transportasyon diin pipila sa gamiton kon i-deploy mao ang mga behikulo nga iya sa gobyerno.
Gisabot na lang usab sa konsehal ang pampublikong transportasyon sanglit nag-aninaw sab ang mga operators ug ang mga drivers sa sitwasyon hilabi na nga mibalik na og saka ang presyo sa petrolyo ug dugang pa gyod ang pagkunhod sa 50% sa mga pasahero sa matag PUJ.
RadyoMaN Joel Viray
tag: DXDC 621 RMN Davao
