General Santos City—kritikal ang kondisyon sa usa ka misis human gipusil sa iyang bana samtang patay usab ang suspek human naghikog sa may Purok Ondok Gawan, Barangay San Jose ning dakbayan.
Giila ang bana nga si Desie Jim Grana, 39 anyos, lumulopyo sa nasampit nga lugar samtang ang asawa niini giilang si Meriam Grana, 37 anyos, kanhing OFW.
Sa inisyal nga imbistigasyon sa Police Station 7, nasuta nga alas 7:30 sa kagabie una nang nagkalalis ang suspek ug ang asawa niini nga miresulta sa pagpamusil sa bana ngadto na sa ginang kung asa human sa insidente nagpakamatay usab ang suspek .
Ayha pa nahitabo ang insidenti, nagbingkil ang magtiayon human nga gipamugos sa bana nga muinum sila uban sa iyang mga amigo sa tindahan nga gidumalahan sa ginang, apan nagdumili ang nasangpit hinungdan nga nasuko ang suspek.
Iyang gituok ang iyang asawa, samtang gituok sa suspek ang ginang nakahigayon kini nga makakuha ug kutsilyo, iyang gidunggab ang iyang bana. Didto na mibunlot ug pusil ang suspek dayon iyang gipusil ang iyang asawa igo sa liog, human niini siya na usab ang nagpakamatay.
Sa pagkakaron nagpabilin pa sulod sa Gensan medical center ang asawa si Meriam human kini maigo sa iyang liog nga bahin samtang ang patayng lawas sa bana niini ang anaa karon sa Labajo funeral homes. (Ray Sabillo)
