Hugot ang panindugan ni Banga Mayor Albert Palencia nga indi siya imbolbado sa illegal drug activity base naman sa nabalhag sa resolution sang National Police Commission rason nga isa siya sa ginkakasan sang police power.
Suno kay Mayor Palencia ginahimo gani sang iya nga administrasyon ang tanan nga matapna ang iligal nga droga sa banwa kapareho na lamang sa pagbutang sang action officer sa Municipal Anti-Drug Abuse Council agud nga matutukan ang nasambit nga problema kag pagpatigayon sang drug symposium sa mga kabaranggayan.
Nagapadayon man ang operasyon sang kapolisan kag Philippine Drug Enforcement Agency ukon Pdea 12 kontra droga sa banwa.
Nagapati naman ang alkalde nga posible mali nga impormasyon nga ginpalab-ot sa national kon ngaa nalakip ang iya nga pangalan matapos nga nauna na nga nagpacleared siya sa Pdea 12 angot sa pag-imbolber man sadto anay sang iya nga pangalan sa illegal drug activity.
Samtang suno sa alkalde wala siya sang mahimo kundi tumanon ang nasambit nga kamanduan kag hulaton kon san-o i-lift ang nasambit nga kamanduan sang Napolcom.
Samtang ginpasiguro ni Mayor Palencia sa katawhan sang Banga nga makontrol sa gihapon sang kapolisan ang peace and order sa banwa kag magapadayon ang suporta niya sa local police bisan nga ginkakasan na siya sang police power.
