GENERAL SANTOS CITY- Patay ang pasahero sa traysikel samtang samaron ang drayber niini human gibanggaan og Ford Ranger pick-up ganihang alas-4 sayo sa buntag sa National Hiway, Barangay Baluan.
Giila ni Police SSgt. Joe Marie Rebollos, traffic investigator sa Traffic Management Unit ang biktimang nakabsan nga si Jacinto Evangelio, 50 anyos ug ang samarong drayber sa tricycle nga si Alexander Sangcala, 26 anyos samtang giila sab niini ang drayber sa Ford Ranger nga si Cenon Nualda parehong mga residente sa Brgy. Buayan.
Dugang imbestigasyon ni PSSgt. Rebollos, parehong naglawig sa National Hiway sakop sa Purok Pagkakaisa, Baluan ang tricycle nga paingon og Lagao ug Ford Ranger paingon og Buayan.
Miliko matod pa ang tricycle pabalik sa iyang ruta apan samtang anaa kini sa inner lane kalit nga napalong ang makina ug na-stock tunga-tunga sa dalan.
Diha-diha nga niabot sa inner lane ang pick-up ug napunggit niini ang traysikel nga nalabay sad og pila ka metros sa kakusog sa impact.
Nalumping ang traysikel timailhan sa pagka-ipit sa pasahero sa sulod.
Miresponde sab ang mga barangay tanod sa Baluan ingon man ang mga rescue team sa CDRRMO sa Gensan.
Gidala ang mga biktima sa Dr. Jorge P. Royeca Hospital apan gideklarang dead on arrival si Evangelio samtang si Sangcala ang nakaangkon og samad sa iyang ulo ug bali ang tuong bukton.
Walay tatsa sa iyang lawas ang drayber sa pick-up nga anaa karon sa kustodiya sa TMU.
For more info’s and updates, like and share our official facebook account : www.facebook.com/ifm91.9Gensanofficial/
[image: BANGGA.jpg]
