BACOLOD CITY – Nag-abot na sa Bacolod City halin sa Iloilo ang bangkay sang soldado nga isa sa apat nga napatay sa enkwentro nga natabo sa Inabanga, Bohol sadtong Abril 11.
Masubo man apang ginbaton na gid lamang sang asawa nga si Jane Cajaban ang nadangtan sang iya bana nga si Cpl. Meljune Cajaban, 29 years old kon diin iya ginsiling nga kabahin na ini sang ginsumpaan nga trabaho sang iya bana bilang soldado sang gobierno.
Si Cajaban ang isa sa apat ka katapo sang military at pulis nga napatay sa natabo nga enkwentro batuk sa Abu Sayaff sa Bohol.
Ang bangkay sang amo nga soldado ang nahaya karon sa balay sang pamilya sang iya asawa sa Brgy. Villamonte kag natalana nga igalubong sa maabot nga Domingo, April 30 kag ini siya ang pagahatagan sang full military honor sang AFP.
Duha ka mga kabataan ang ginbilin ni Cajaban sa iya asawa, isa ka duha ka tuig kag isa ka duha ka bulan pa gid lamang.
Kaupod ni Cajaban nga napatay sa amo nga enkwentro ang isa pa ka taga Sagay City, Negros Occidental nga si Sgt. John Dexter Duero.
