BACOLOD CITY – Nakahaya na karon sa Rolling Hills Memorial Chapel sa Brgy. Mandalagan ang bangkay sang gintiro patay nga si Col. Santiago Rapiz sa Dipolog City sang nagligad nga Lunes sang gab-i.
Ginpahayag nga nag-abot sa Bacolod ang bangkay ni Rapiz may mga las 2:30 sini gid lamang nga kaagahon halin sa ciudad sang Dipolog.
Una nga nag-abot sa haya ni Rapiz amo ang iya kamagulangan nga anak na si Evelyn subong man ang pila ka mga himata kag kaabyanan sang amo nga pulis.
Ang bangkay ni Col. Rapiz nakabutang sa isa ka puti nga lungon kag may nakabaton nga Philippine flag.
Sa karon ginahulat pa ang pamilya ni Rapiz nga makapagwa sang ila official statement kon diin wala pa man natalana ang petsa sang iya lubong.
Si Col. Rapiz, 53 anyos, natawo sadtong April 26, 1965 kag may tatlo man ka mga kabataan nga police na sa karon, isa ka PO2 kag duha ka PO1.
November 5, 2018 ukon Lunes sang gab-i sa natiruhan si Rapiz sa San Andres College, Dipolog City matapos naghampang sang basketball./dyHB BACOLOD
