Cuartero, Capiz – Nasapwan na ang bangkay sang 9 ka tuig nga bata nga nalumos sang nagligad nga adlaw sa suba nga sakop sang Brgy. Manhoy, Dao, Capiz. Nakit-an ang lawas sang biktima nga nagalutaw na sa suba mga alas 6:00 kaina sang aga.
Ginkilala ang biktima nga si Jonel Bigno kag residente sang nasambit nga barangay. Nahibluan nga naglisensiya ang biktima sa iya iloy nga magapadulong sa isa ka birthday party sang Oktubre 2 apang wala ini ginpasugtan. Lipod sa ihibalo sang iya iloy nga naglakat ang biktima kag naglangoy sa suba. Bangud madalom ang tubig, natigayon nga malumos ang biktima.
Nagresponde ang Capiz Emergency Response Team (CERT)-Aksyon Tabang kag iban pa nga Rescuers agud salbaron ang kabuhi sang bata apang wala gid ini nakita. Kaina sang aga isa sa mga residente sang Brgy. Nagba, Cuartero, Capiz ang nakakita nga may nagalutaw nga lawas sang tawo sa suba kag gilayon ini nga ginreport sa Cuartero PNP.
Sa bulig sang Capiz Emergency Response Team, MDRRMO sang Dao kag Cuatero, PNP , BFP kag mga Brgy. Officials, nakuha ang bangkay sang biktima.
(photo from Cuartero MDRRMO)
