Report ni: Jennifer Palomo Debaja
Puno sang emosyon ang pamilya kag kaabyanan ni Constancia Dayag sang mag abot ini nga isa na ka bangkay sa Ninoy Aquino International Airport kaina sang hapon.
Si Dayag ang OFW nga napatay sang gindala ini sang ambulansiya sa ospital sa Kuwait sang Mayo 14. Gina patihan ginkastigo kag gin himuslan ang biktima antis napatay.
Kaupod sa nagsugat sa bangkay sang OFW ang pila ka opisyal sang gobyerno sa pag panguna ni Foreign Affairs Secretary Teddy Locsin.
Base sa death certificate nga ginrelease sang Al-Sabah hospital “under investigation” pa ang kabangdanan sang kamatayon sang pinay.
Nagpasalig naman ang DFA, nga kon mabaton na sang ila opisina ang kopya sang forensic report halin sa Kuwait insigida ini nga pagasekyaron sang National Bureau of Investigation (NBI).
Nag request naman ang DFA sa NBI sang independent autopsy kag toxicology tests sa bangkay sang OFW.
Samtang, ginpahayag naman sang opisyal sang DFA nga padayun sila nga makig coordinate sa Philippine Embassy sa Kuwait agud mapadasig nga maka come up sang resolusyon sa felony murder case nga una na nga ginpasaka sa Kuwaiti General Prosecutor’s Office.
Apang wala pa gin reveal sang DFA kon sin o ang ginkasuhan kaangut sa pagpatay kay Dayag.
