BACOLOD CITY – Patay ang isa ka lalaki nga nagadala sang motorsiklo, pilason ang iya backrider matapos ini nakadalasa sang nagalapta nga lubi sa dalan kaina sang kaagahon sa Circumferential Road, Brgy. Taculing, Bacolod City.
Nakilala ang biktima nga napatay nga si Jomar Pabon, 24 anyos ang edad, soltero, samtang ang samaron naman niya nga backrider ginkilala kay Kevin Parreño, 26 anyos, single, lunsay pumuluyo sang HT Jocson Subdivision, Brgy. Taculing, sining ciudad sang Bacolod.
Suno sa traffic investigator, may mga la 1:10 kaina sang kaagahon sa area sang Bangga Suntal, Circumferential Road ang mga biktima sakay sang motorsiklo ang nakadalasa sang mga dahon sang lubi nga nagalapta sa dalan.
Bangud sini, nag-isi isi ang dalagan sang motor kag nakabunggo sa puno sang lubi nga yara sa higad sang dalan.
Nag-angkon sang serious physical injuries ang mga biktima gani ini sila ang gindala sa Corazon Locsin Montelibano Memorial Regional Hospital apang si Pabon ang gin-declare dead-on-arrival./dyHB BACOLOD
