Maayon, Capiz- Patay ang isa ka persona matapos nga ginluthang kag ginlabo sa Brgy. Bongbongan banwa sang Maayon alas 8:30 sang gab-e bangud gid lamang sa ginserahe nga kahoy.
Ginkilala ang biktima kay Armando Decamos y Rigos, 50-anyos sang nasambitan nga lugar nga nag-angkon sang madamo nga kapilasan sa lawas kag gintunaan sang gilayon sini nga kamatayon.
Suno kay PO1 Vincent Dumagpi, nag-agi ang suspek nga si Gemuel Suarez sa balay sang biktima kun sa diin nagluntad ang komprontasyon sa tunga nila bangud sa pagserahe sang suspetsado sa kahoy nga yara nahamtang sa prente ukon atubang sang poluy-an sang biktima.
Sang ginpaliso sang suspek ang motorsiklo nga ginamaneho sini, gilayon nga ginluthang ang biktima nga naigo sa dughan kag tiyan. Sang matumba sa duta, ginkuha pa sang suspek ang sanduko nga ginataklos sang biktima nga si Armando Decamos kag iya ginlabo sa ulo, likod kag iban nga parte sang lawas.
Narekober sa crime scene ang walo ka baseyo sang .22 caliber revolver. Samtang padayon pa tubtob sa subong nga atlarge ang suspek matapos nga nagpalagyo sang makomiter ang krimen.
