Madalag, Aklan — Patay rong sangka eaeaki matapos nga barilon kabii sa Brgy. Medina, Madalag, Aklan.
Nakilaea rong biktima kay Roger Zonio y Nabor, 31-anyos samtang rong suspek nakilaea kay Felino Juanito y Apolinario, sa legal nga edad tanan residente it nasambit nga lugar.
Suno kay SPO2 Abdon de Mateo it Madalag PNP ag imbestigador sa nasambit nga kaso nga naka baton sanda it tawag sa punong barangay ko nasambit nga barangay nga may natabong pagpamaril.
Sa imbestigasyon naga guwa, nga kahapon hay nag inuman rong biktima ag suspek it temprano pa ag pagkatapos hay mansig uli man sanda.
Tag idto eon ro biktima sa andang baeay binuoe na ro anang pogakhang. Bangud sa kahadlok ko asawa it biktima hay nagpangayo raya it bulig sa andang kaeapit nga mabuoe rong baril sa anang asawa.
Nakapatigayon pa raya it pagpaeopok ag pagkabati it suspek hay dumaeagan man raya pauli sa anang baeay nga sambilog ag bumuoe man it pogakhang ag umadto sa baeay it biktima.
Maangan angan hay may nabatian dayon nga eopok ag rato rong ginapatihan nga tumama sa biktima.
An um ka tama it perdigunes sa tiyan rong naagkon it biktima.
Nasayuran nga rong baril it biktima hay baril man it suspek nga gintao kana para man sa andang self defense.
Ro suspek hay asawa it sambilog sa mga Brgy. Tanod it Barangay.
Narecover sa crime scene rong fired cartridge it 12 gauge shot gun ag sambilog nga uwa pa nakaeopok.
Rong baril it biktima hay uwa ma recover ag gina usoy pa it mga pulis.
Samtang rong suspek hay nagapabilin nga at large daea ro anang baril.
Ginpaidaeom man eon sa post mortem examination rong bangkay it biktima.
Padayon pa rong imbestigasyon it Madalag PNP angot sa nasambit nga krimen.
