Sumala ni Davao Del Sur Police Provincial Director Col. Giusseppe Geralde nga hilit ang pinuy-anan sa mga biktima ug sagad sa mga nagpuyo magpartidos ug suod nga managsilingan maoy rason nga gisiguro ug patay sa suspek ang magtiayon kay posibling naka-ila.
Matud ni Geralde nga aduna nay usa ka person of interest nga gitutukan karon ang Bansalan PNP apan gitun-an usab ang bag-ong teorya nga posibling dili lang usa ang reponsabling mihimo sa krimen.
Nagkanayon ang Director nga posibling suhito ang suspek nga adunay sapi ang mga biktima tungod kay bag-ohay lamang nga nahalinan og kopras ang magtiayon.
Gidugang sa opisyal nga nasubmiter na sa Bansalan PNP ngadto sa forensic ang swab nga nakuha gikan sa kinatawo sa asawa aron matino kun kini nalugusan.
Nanawagan ang hepe sa kapulisan sa probinsya ngadto sa katawhan ilabina sa mga nanimuyo sa mga hilit nga barangay nga ug adunay mamatikdan nga bag-ong dagway sa ilang dapit itaho gilayon pinaagi sa PNP Text Hotline.
Kahinumduman nga nadiskubrehan sa ilang silingan ang magtiayong Modesto ug Evelinda Gumapac niadtong Huwebes sa hapon Marso 30, 2023 nga wala nay mga kinabuhi.
RadyoMaN Erin Lumosbog
