Roxas City, Capiz- Nagbisita kahapon nga adlaw ang hubon sang dyVR sa barangay sang Banica partikular na sa Sitio Iwahig para sa nagapadayon nga adbokasiya sini nga ‘Bantay Dengue sa Barangay”.
Nagpanagtag sang fliers ang team agod nga mabuligan palapta sa mga pomuluyo ang ila dapat himuon agod nga makalikaw sa makamamatay nga masakit nga dengue.
Samtang may yara man sang naglecture sa mga ginikanan kag kabataan nga naga-eskwela sa Day Care Center sang nasambitan nga barangay sa Sunshine Village.
Suno pa sa isa sa mga residente nga si “Nanay Mildred” nga may yara sang nabiktima anay sang dengue sa ila lugar sang nakaligad nga bulan sang Abril gani todo-paglimpiyo ang ila ginahimo sa subong.
Sa paglibot sang grupo, makit-an nga barado ang mga drainage system nga isa sa mga ginatudlo nga lugar nga sarang pangitlogan sang lamok nga nagadala sang Dengue virus.
Nahibaloan nga base sa datos sang Provincial Health Office(PHO) naghalin sa barangay sang Banica ang pinakauna nga casualty bangod sa dengue subong nga tuig diri sa Roxas City.
Sunod nga pagabisitahon sang Bantay Dengue sa Barangay Team amo ang barangay sang Tiza.
