Jamindan, Capiz – Nabalhag ang isa ka panibag-o nga kaso sang COVID-19 sa Capiz.
Base sa ginpaguha nga status update sang Capiz Provincial Health Office, isa ka Locally Stranded Individual(LSI), 18-anyos nga babayi nga taga- Barangay Santo Rosario, nagikan sa banwa sang Jamindan kag may travel history sa Parañaque City, Metro Manila ang pinakaulihi nga nagpositibo sa amo nga balatian.
Nag-abot ini sa Capiz sang Hulyo 30 paagi sa sweeper flight, Mnl- Rxs kaupod ang 40-anyos nga amay.
Ginpatigayon ang Rapid Diagnostic Test sa Roxas City kun sa diin ang mga ini ang IgG positive kabangdanan nga ginpahamtang sa facility quarantine sa Jamindan Crisis Center.
Una sila nga ginkuhaan sang swab sang Agosto 3 apang nangin ‘Invalid Specimen’ gani nga liwat ginpaidalom sa repeat swab sang Agosto 11 kag diri nagguha ang resulta sang Agosto 18 nga nagasiling nga positive sa SARS COV 2 ang 18-anyos nga anak samtang negatibo naman ang amay.
Nagapabilin nga ASYMPTOMATIC ang amu nga mga persona.
Sa karon, nagadangat na sa 106 ang kabilugan nga kumpirmado nga kaso sang COVID-19 sa Capiz sa diin 21 ang aktibo nga kaso, 82 ang mga nakarekober kag 3 ang mga napatay.
