Tinambac, Camarines Sur– Dara ang saiyang adbokasiya na Asenso ng Bahay, Asenso kan Buhay, linibot ni Arnie Fuentebella ang mga barangay sa banwaan kan Tinambac.
Sa laog nin tolong aldaw, kaibahan si Vice Governor Russel Banes, Board Members Awel Llaguno asin JJ Pilapil asin ang grupo ni Mayor Rosito “Itoy” Velarde, binisita nya an Barangay San Roque, Magsaysay, Mananao, Sta Cruz (Pob), Tamban, Olag Pequeno, Buyo, Binalay, San Pascual, Lupi asin ang Tierra Nevada.
“Dai ako mapabaya. Ining aki nindo, si Arnie Fuentebella, matao nin atensyon sa mga programa na makakatabang sa pag asenso kan lambang bahay asin lambang pamilya, nin huli ta ini ang mapa asenso kan buhay”, ini ang naging sentro kan mensahe ni Arnie Fuentebella, aspirante para Congressman kan ika-apat na distrito kan probinsya.
Sinabi nya pa na magiging ehemplo an ginibo niyang lakdang sa pagtogdok kan Tigaon Infirmary sa laog sana kan enot nyang termino bilang Mayor kan banwaan nin Tigaon. Sa ngunyan, an Tigaon Infirmary igwang doktor na nka-duty beinte kwarto oras. Igwa man ining Animal Bite Center.
Magigiromdoman na sa irarom kan saiyang liderato, pigrekonocer an Tigaon sa lado nin Good Housekeeping, agrikultura asin negosyo. Narecibe man kan banwaan an Rank 10 Over-all sa National Competitive Index para sa 3rd to 4th Class LGU na tinao kan National Competitive Council of the Philippines.
Dugang pa ni Arnie Fuentebella na sa saiyang magiging liderato sisiguruhon niya na maipapadagos ang pagtao nin suporta sa mga mahihigos asin deserving na estudyante sa paagi kan Educational Financial Assistance sa irarom kan Fuentebella Educational Financial Assistance Program na sa presente igwa nin 555 na iskolar.
Maogma na nag puli ang mga residentes kan Tinambac nin huli ta namatean ninda ang pagpadaba asin pagmakulog sa sainda ni Arnie Fuentebella na siring sa pagkamoot kan sarong aki sa saiyang magurang. # Nikko Parpan
