Davao City – Sa kantidad nga P5,000, nanghangyo matud pa ang usa ka bao-bao driver nga muhalok ug mugakos sa iyahang pasaherong babaye sa Bilawan area, Mati City, Davao Oriental pasado alas 6 sa gabii niadtong August 2, 2024.
Sa post sa usa ka Niezel Cuda, gibutyag niini nga naghilak ug nagkurog nga misumbong kanila ang iyang ig-agaw nga babaye human giingong gibastos sa maong driver. Gisaysay niini nga misulti ang maong lalaki nga dili lang magsaba nga muhatag siya og 5k kambyo sa gakos ug halok.
Sumala sa uploader, dakoon ug bungoton ang maong lalaki nga adunay color pula nga bao-bao. Gipaigmat usab niya ang katawhan sa Mati ilabi na sa mga commuter nga babaye nga kung mamahimo, dili musakay kung nag-inusara ilabi na og lawom na ang gabii.
Gisuwayan usab sa DXDC RMN Davao og kuha ang bahin sa Mati City Police Station apan sumala pa, walay nagpatala sa ilang buhatan kalabot sa maong insidente.
RadyoMaN Ivy Parido
Facebook Comments
