TACLOBAN CITY – Nagkalat an report han pamalit hin botos dida han lunes adlaw han eleksyon ha magkadurudilain nga barangay dinhi ha Sinirangan Bisayas, pero mayada usa nga barangay ha Tacloban nga waray gumagad hini.
Waray kwarta nga ginhatag an mga kandidato ngan waray liwat mga botante nga kumarawat ha Barangay 36-A dinhi ha Tacloban durante han Barangay Ngan Sk Elections.
Nagpapasalamat an mga nagdaog kay waray gud hira gumastos hin dako han nakalabay nga piniliay.
Hi Rebecca Obenieta Palomino nga ginpirdi niya an tulo nga nangandidato kumo barangay kapitan, sumala ha iya, gumastos la hiya hin nagkakantidad P5, 000.00 ha duha ka semana nga pangampanya para han iya mga tarpaulins ngan fliers.
An first timer candidate naman nga hi Analiza Siguan, gumastos la hin 1, 000 pesos ha pangampanya.
Mayada 370 registered voters an barangay 36-A nga may 1300 nga mga residente. Mayada annual budget an barangay nga 1.6 million pesos.
Naghihingyap naman an mga barangay opisyales nga masustinar ini nga pamatasan han mga tawo ha ira barangay.
Hi Palomino, Siguan ngan an ngatanan nga elected councilors nga hira Resurreccion Tingzon, Virginia Cabrera, Maria Algin Lucero, Ma. Jadit Marchadesch, Lolita Cartalla ngan Arturo Jayan in naproklamar lampas alas na han gab-i dida han lunes.
