Davao City- Usa ka dakong bentaha alang sa usa ka kapitan sa Barangay nga na-reset kun na postpone ang ipahigayon untang Barangay ug SK Elections karong bulan sa Oktubre.
Sa interbyu sa DXDC RMN Davao kang Brgy. Captain Tata Llubit sa Brgy. 9-A, Poblacion ning syudad sa Dabaw nga tungod gibalhin sa May 2018 ang eleksyon, sumala niya nga madungagan ang panahon sa ilang pagpanerbisyo sa katawhan ug mapadayon nila ang mga proyekto nga ilang nasugdan sa Barangay.
Subay kini sa desisyon sa Senado kaganina diin pasado na sa third ug final reading ang pagpostpone sa eleksyon karong bulan sa Oktubre sa botong 17-1.
Ang mga senador nga mibuto niini mao sila Gordon, Poe, Zubiri, Lacson, Angara, Pimentel, Gatchalian, Binay, Sotto, Aquino, Drilon, Escudero, Legarda, Pacquiao, Pangilinan, Recto, ug Villanueva samtang si Senator Risa Hontiveros lang ang mikontra ug walay nag-abstain.
Dugang niini, sa bersyon Senado, gitanggal ang probisyon nga magtugot kang Presidente Rodrigo Duterte nga magtudlo og Officer-In-Charge kun OIC sa mga barangay.
Gikatakda nga himuon ang eleksyon sa ulahing lunes sa Mayo sunod tuig.
RadyoMan Renz Barbarona
