Davao City – Uyon si Leon Garcia Agdao Barangay Captain Lita Empis nga ipailawom sa hard lockdown ang mga barangay nga adunay hataas kaayong kaso karon sa coronavirus disease kon COVID-19 dinhi sa syudad sa Davao.
Segun ni Empis, daku’g ikatabang diha sa pagsanta sa pagkuyanap sa virus ang hard lockdown nga himoon diha sa mga barangay nga sutoy kaayo ang kaso sa maong makalilisang nga klase sa balatian.
Suportado ni Empis ang pagdeklara og 14 ka adlaw nga hard lockdown sa Barangay 23-C Isla Verde Boulevard diin dayag usab nga maapektuhan ang inadlaw-adlaw nga mga aktibidades ug kinabuhi sa liboan ka mga residente sa naasoy nga dapit.
Alang sa kapitana, ang COVID-19 kulba nga matang sa virus tungod kay ang tawo nga matakbuyan niini puwedeng mamatay kung dili matabang og tambal sa mga medical practitioners ilabi pa nga wala pa baya nato madiskubrehi ang vaccine kun bakuna alkontra niini.
Angay lamang nga sundon sa publiko ang awhag ni Mayor Sara nga likayan lamang usa ang pagbisita ug pag-adto sa Barangay 23-C ug uban pang mga barangay nga maayong pagkaigo sa COVID-19.
Gipalanog usab sa nasangpit nga barangay official ang iyang tambag sa tanan nga kanunayon ang pagsuot og facemask ug pagtuman sa social and physical distancing aron ang COVID-19 malampusong mabatukan sa katawhan.
RadyoMaN Joel Viray
