Davao City – Gitahasan ni Davao City Mayor Sara Duterte ang mga Barangay Kapitan sa pagmuntar og ilang mga isolation facility aron makontrola ang padayong pagkuyanap sa COVID-19 sa syudad sa Davao.
Matud sa Mayor, kinahanglan dili kini mga eskwelahan ilawom sa Department of Education (DEPED).
Gibutyag niini nga 4 sa 52 ka mga indibidwal sa Barangay Leon Garcia ug Barangay 23-C ang nagpositibo sa COVID-19 sa gihimong random testing.
“Out of 15, dunay tulo nga nagpositive sa Leon Garcia ug isa sa Isla Verde sa Barangay 23, out of 47 nga atoang gikuha, dunay isa nga nag positive,” sumala niini diin ang usa sa 4 ang asymptomatic.
“More dangerous ang asymptomatic. Kadtong nakuha nato sa Brgy. 23, asymptomatic siya so wala siya sa ospital, naa siya sa isa ka center. Wala gyud siyay symptoms, walay sip-on ug ubo. Possibly daghan ang mga ani that’s why miingon ko nga importante dunay quarantine, isolation, dunay uban nga wala gyuy gibati. Possibly makatakod ng ing-ani kay asymptomatic, more dangerous kay abi nila’g okay lang sila,” saysay sa alkalde.
Sa Davao, 16 na ka mga eskinita (street) ug household ang gi-lockdown tungod sa natalang COVID-19 nga kaso sa ilang mga lugar.
RadyoMaN Aimee Guinita
