General Santos City– Patay si Malapatan, Barangay Sapu Masla Incumbent Kagawad Jaron Malagos, human kining gipusil samtang kini nangampanya didto sa Purok Kalagumit, Barangay Sapu Masla, kagahapon sa buntag.
Sumala ni Police Chief Inspector Romeo Calamba, Chief of Police sa Malapatan, Municipal Police Station nga uban sa biktima ang asawa niini nga si Rowena Malagos ug ig-agaw niini sakay sa ilang sakyanan apan pag abot sa may Purok Kalagumit, didto na sila gipamusil.
Patay on the Spot ang biktima samtang swerti nga wala maigo ang asawa niini ug ig-agaw human nga nakanaog gilayon sa sakyanan dihang sila giratratan sa upat ka mga suspek.
Positibo usab nga giila sa asawa sa biktima ang mga suspek nga silang si Kim Sambaga, Al Sambaga, Mis-an Sambaga ug Muhalidin Sambaga nga maoy mipusil patay sa iyang bana.
Anggulong gitutukan sa kapulisan sa kasamtangan ang bahin sa pagpanimalos ingon man ang bahin sa politika human subling nagpapili ang biktima.
Nasayran nga sa gihimong imbistigasyon sa kapulisan ngadto kang Rowena nasuta nga daan nang may bahad sa kinabuhi ang iyang bana gikan sa pamilyang Sambaga.
Gikaingong siya maoy gipasanginlan sa pamilyang sambaga nga migiya sa kapulisan dihang gihimo ang operasyon batok sa usa ka opisyal sa ilang barangay nga si Bong Sambaga kansa namatay sa drug operation sa Awtoridad.
