Katipunan ZN – Patay ang usa ka Kagawad sa Barangay Malasay sakop sa lungsod sa katipunan ning lalawigan sa Zamboanga del Norte human aksedenting nahulog sa pangpang nga iyang giagian pasado alas 2:00 sa miaging kadlawon didtong dapita sa suba sa Brgy. Balok sakop sa maong lungsod.
Sa report sa Katipunan PNP naila ang biktima mao si Rolan Tubon Lumon, 31 anyos, minyo ug kasamtangan Barangay Kagawad sa Malasay.
Matud pa, ang biktima uban sa iyang bayaw nga si Sannyboy Sumampon, pasado alas 2:00 sa hapon ilang giplastar ang mga gipangtaan taga sa kasili diha sa kilid kilid sa suba duol sa busay.
Ang duha ka nasangpit, nakapauli pa sa ilang balay diin mga kadlawon human sa pagbundak sa ulan ilang matud pang gitibao ang ilang gipangtaan apan diha sa ilang giagiang bakilid na-out balance ang biktima og nahulog sa pangpang nga dunay 130 ngadto sa 150 metros ang gilawmong nga natugpa sa kabatohan.
Ang biktima wa na matabang sa iyang bayaw human nakaangkon sa mga bon-og og pangus sa lawas ug samad sa ulo niini nga maoy naghatud kaniya sa diha diha nga kamatayon.
