Dipolog City – Tingkagol na karon sa silda sa Dipolog City Police Station ang maglive-in partner human kining nakuhaan sa ginadiling droga atol sa gihimong drug buy bust operasyon sa mga otoridad sa may Lower Banicapt, Barangay Galas ning dakbayan sa Dipolog, alas 3: 50 ang takna sa kahaponon.
Giila ang mga suspek nga silang si Fredie Penales, alyas fredie long hair 37 anyos, usa ka cellphone technician ug ang live-in partner nga si Mariluo Rollon, alyas Shy Rollon, 29 anyos, usa ka bar tender ug polos residente sa dapit.
Nakuha sa posisyon sa mga suspek ang upat ka pakete sa gituohang shabu nga gibana-banang mokantidad og 10mil ka pesos ang estimated market street value.
Subay sa report sa operative City Drug Enforcement Team pinaagi ni Police Chief Inspector Vergil Bruce Dario, Chief Intelligence nga dugay na nilang gimonitor ang mag live-in partner gumikan sa mga report nga matud pa lambigit ang duha sa pagpamaligya ug ginadiling droga.
Dihang nataymingan sa kapulisan, gilayon nga gilusad ang operasyon nga miresulta sa pagkasikop sa mga nasangpit sulod sa giabangan boarding house.
Sa karon napasakaan na ang duruha ug kasong kalapasan sa R.A 9165.
