Detinado sa Agora Police Station ang 33 anyos nga barangay kagawad sa Bukidnon human madakpan sa gihimong joint drug buy bust operation sa kapolisan.
Suspek naila nga si John Mark Sabanal, 33 anyos, kasamtangang Barangay Kagawad sa San Roque, Sumilao, Bukidnon.
Napalit kang Sabanal ang usa ka heat sealed transparent plastic sachet sa gituohang shabu nga nagkantidad og usa ka libo ka pesos.
Atol sa operasyon, nakompiska usab sa posisyon ni Sabanal ang usa ka libo ka pesos nga buy bust money, upat ka heat sealed transparent cellophane sa gituohang shabu ug usa ka LG black nga cellphone.
Ang nasangpit nga ebidensiya ang i-submit sa PNP Crime Laboratory 10 alang sa qualitative ug quantitative examination.
Samtang, wala matud pa magdahum si San Roque, Sumilao Bukidnon Kagawad John Mark Sabanal nga ang iyang higala ang magtukmod kaniya sa presuhan.
Matud ni Kagawad Sabanal nga nagdahum siya nga ang iya pang higala ang mi-text kaniya nga aduna pa kini item sa shabu apan ang kapolisan na ang mihimo niini.
Nasayran nga giangkon ni Kagawad Sabanal nga iya ang upat ka sachet sa shabu nga nakuha sa iyang posisyon ug kini gamiton isip pangkunsumo.
