iFM Laoag – Marikna ti nairut a trapiko iti agdama a mapaspasaran dagiti motorista ken biaheros iti Ilocos Norte kalpasan a naiyuswat ti “NO LEFT TURN” traffic advisory manipud iti PNP Traffic Division nangnangruna iti passet ti Manila North Road wenno ti kalsada iti ili ti San Nicolas a mapan iti siudad ti Laoag.
Segun ken ni Lt. Col. Amador Quiocho, Chief of Police ti PNP Laoag City, iti nasao a “NO LEFT TURN” ket saan a bumayag a maipatungpal agsipudta daytoy ket maysa laeng a “dry-run” para iti pannakadal nu ana ti kangrunaan a makaigapo ti nairut a trapiko iti lugar.
Iti agdama, naruay a reklamo dagiti motorista ken biaheros agsipudta nu man pay adda iti nakaituding a diversion road tapnun nu ti kasta ket malimitaran ti trapiko iti lugar ket saan latta makaumanay, gapuna ta ngumatngato latta ti bilang dagiti luglugan a sumsumrek ken rumrumwar iti siudad.
Basar ti plano ni Governor Matthew Marcos Manotoc, kalikagom iti a gobierno probinsial a mangipatakder ti maysa pay a diversion road gapuna ta saan payen a makaumanay ti double lane nga ipatpatungpal iti DPWH, kasta pay iti road-widening project gapu ta adu latta ti papaanawa.
Nangrugi met ti dry-run itay bigat ti oras ti alas kuatro agpatingga’t alas otso (4-8am) ken iti malem ti oras ti alas singko (5pm) a maibilang a peak hour iti apektado a lugar.
Bernard Ver, RMN News
