General Santos City—kritikal nag kahimtang sa usa ka Barangay kapitan sa Barangay Nalus, Kiamba, Sarangani Province human kining gitigbas sa usa ka residenti sa samang Barangay alas 10:00 ang takna sa buntag, Martes, July 11, 2017.
Ang biktima nailhang si Barangay Nalus Kapitan Nansanciano Marcillana Jr., legal age, residenti sa samang Barangay.
Una nang gitigbas ang maong Kapitan sa suspek nga si Fernando Kumalig, legal age, residenti sa Prk. Talisay, Barangay Nalus sulod mismo sa compound sa Barangay Hall.
Sa inisyal nga imbistigasyon sa Kiamba Municipal Police Station sa pagpanguna ni Police Chief Inspector Ray Salgado, Hepe sa Kiamba MPS nasuta nga anaa sa likod nga bahin sa Barangay hall ang biktima dihang kalit miabot ang suspek dayon walay sulti-sulti iyang gitigbas ang Barangay kapitan igo sa iyang ulo ug liog nga bahin.
Tungod tapad lang sa Barangay Hall ang Company Headquarters sa 3rd Maneuver Company sa Regional Public Safety Battalion paspas nga mirespondi ang ilang tropa apan gisuwayan ug tigbas sa suspek ang usa sa miresponding pulis hinungdan nga kini napusilan.
Nakaangkon ug samad sa ubos sa iyang tiyan ang suspek kansa gidala gilayon sa ospital dungan ni Kapitan Marcillana apan nakabsan ug kinabuhi si Kumalig.
Samtang si kapitan Marcillana ang anaa sa kritikal nga kondisyon tungod sa samad nga iyang naangkon.
Sa kasamtangan ginasuta pa sa kapulisan ang motibo sa pagpanigbas kang Kapitan Marcillana.
