Sikop ang kasamtangang barangay chairman sa Barangay Patag sa lungsod sa Opol, Misamis Oriental, alas- 6:30 sa buntag kagahapon, Domingo, Mayo 6.
Kini atol sa gihimong anti-drug operation sa Provincial Drug Enforcement Unit sa Misamis Oriental sa Distrito 2, dala ang search warrant nga gipagawas ni Judge Renato Arroyo sa 10th Municipal Circuit Trial Court.
Naila ang dinakpang opisyal sa barangay nga si Hermito Barangot Laid, 44anyos, residente sa nasangpit nga lugar.
Na- recover atol sa pagpangukay sa kapulisan ang siyam ka sachet nga adunay sulod sa gitouhang shabu, usa ka granada ug cellular phone ug mgadisposable lighters nga mamahimong ebidensiya sa ipasakang kaso batok ngadto sa kapitan.
Wala sa listahan sa PhilippineDrug Enforcement Agency o PDEA ang maong barangay official nga gipagawas niadtong nakalabay’ng semana.
Apan miingon si Police Senior Inspector James Bastatas sa PDEU, niadtong makalabay’ng tuig pa gipa-ilawom sa surveillance si Laid tungod sa posibilidad nga pagkalambigit niini sa kalihukan sa ilegal nga droga.
Kandidato alang sa umaabot nga Barangay Elections si Laid alang sa iyang ikatulo ug katapusang termino.
Si Laid ang ika- unom nga barangay official sa Misamis Oriental nga nasikop sa anti-drug operation sa kapulisan, ikatulo nga nasikop nga barangaykapitan. (Divina M . Suson)
*Photo credits to the owner
