MAKADAWAT usab gikan sa Provincial Government of Bukidnon ang mga opisyales sa 464 ka mga barangay sa tibuok probinsya, kung aha adunay gitaganang pondo kantidad ug ₱29,232,000.00.
Sugdan ang pagpagawas sa maong tabang-pinansyal karong Disyembre 7, 2020 ug gibana-bana nga mahuman sa Disyembre 14, 2020.
Base sa Sangguniang Panlalawigan Resolution No. 2020-1929(26th SP), nga gi-ulohan ug paghatag pagtugot sa hangyo ni Provincial Governor Jose Ma. R. Zubiri, Jr. nga mahatagan ug tabang-pinansyal, gumikan sa pandemya nga hatud sa COVID-19, ang tanang Punong Barangay uban ang tanang Barangay Kagawad, Barangay Treasurer, Barangay Secretary, mga SK Chairman ug Barangay IPMR.
Gipasabot sa maong Resolusyon nga ang maong tabang-pinansyal tukma ug katuohan ning panahon sa pandemya nga matunolan sa hinabang ang mga lumilihok sa barangay nga kadaghanan anaa sa frontline services.
Subay sa nakatakda nga pagpang-apod-apod, ang mosunod mao ang adlaw gitagana sa matag lungsod sa probinsya: Disyembre 7, 2020, ang grupo sa pagpang-apod-apod anaa sa mga lungsod sa Talakag, Baungon, Malitbog, Libona, ug Manolo Fortich; Disyembre 9, 2020 – Damulog, Kibawe, Dangcagan, Don Carlos, ug Kadingilan; Disyembre 10, 2020 – Kalilangan, Pangantucan, Maramag, ug syudad sa Valencia; Disyembre 11, 2020 – Kitaotao, Quezon, ug San Fernando, lakip na ang tulo ka mga Barangay sa Kitaotao ang Barangays Kiulom, Panganan ug Digongan; Disyembre 14, 2020 – Sumilao, Impasugong, syudad sa Malaybalay, Lantapan, ug Cabanglasan.
