Malaybalay City, Bukidnon – Gipasabot sa Department of Interior and Local Government kon DILG Bukidnon ang kamahinungdanon sa gihimong General Orientation on Federalism sa siyudad sa Malaybalay dili pa lamang dugay.
Nasayran nga nagkatigom ang mga Punong Barangays, Sangguniang Barangay Members, Barangay Secretaries ug IP Mandatory Representatives (IPMRs) gikan sa 464 ka mga barangay sa Bukidnon nga naglangkob sa 2,300 officials alang sa mao nga kalihukan.
Sa interview sa RMN Malaybalay ngadto kang DILG Bukidnon Provincial Director Bruce Colao gibutyag niini nga ang nag-unang buhatan sa gbyerno nga gitahasan ni Pangulong Rodrigo Duterte alang sa adbokasiya sa pederalismo mao ang DILG.
Maong gipahigayon matud pa ang mao nga aktibidad tumong nga hiusahon ang mga kasayuran nga ihatag sa katawhan aron dili makamugna ug kalibog.
Matud ni Colao nga adunay mga dili musuporta sa mao nga lakang tungod sa kakulangon sa pagsabot kung unsa ang federal form of government.
Pinaagi matud pa sa paghatag ug dugang ug sakto nga kasayuran mamahimo pang mausab ang baruganan sa mga supak niini.
Sigun sa provincial director nga adunay dakog papel nga gihuptan ang mga barangay officials ilabina sa maong nga adbokasiya tungod kay gikonsidera kining mga strategic nga personahe sa komunidad kinsa maoy makapasabot ug makahatag ug katin-awan sa katawhan kung unsa ang federalism.
