Davao City – Nunot sa pag-atake sa gibansagan karon nga Davao Bunal Gang sa pipila ka barangay dinhi sa siyudad sa Davao sa nakalabay’ng mga kagabhion, mas gipakusgan pa karon sa Barangy 9-A ang pagpatuman sa curfew hour kini aron masiguro nga wala na’y mga batan-on magtambay dis oras sa kagabhion.
Sumala ni Kapitan Tata Llubit nga makatabang sa pagsumpo sa mga krimen sama sa riot ang curfew hour sa ilang barangay sanglit mabuyag naman ang mga batan-on nga magbilar og istambay bisan og lawom na sa kagabhion gawas nga dili na sila mabiktima pa sa giingong Davao Bunal Gang.
Sigun ni Llubit nga ila usab gipalig-on ang operasyon sa Oplan Sita ug Kapkap sa mga tawo nga mudayo sa ilang barangay kini aron wala gayo’y dautang mga tawo makahimo og krimen sa ilang lugar samtang maglawig ang kagabhion.
Mismo si Llubit ang nangunay ug nangulo sa iyang barangay tanod sa pagronda palibot sa ilang barangay matag gabii kung asa dili na sab maihap sa mga dautang tawo ang ilang nasikop ug gani duha ka tulisan ang napatay kapulisan human misukol sa nakalabay’ng gabii.
Busa gipanghambog ni Llubit nga nagmalinawon ang ilang barangay gikan sa bisan unsang kri-men ug kaguliyang mugna sa mga tawong dili mahigugmaon sa kalinaw tungod sa gipatuman nga curfew hour ug sa gipalig-on nga siguridad sa ila nga dapit.
RadyoMaN Joel Viray
