Jamindan, Capiz- Padayon ang pagtutok sang local government unit(LGU) sang banwa sang Jamindan agud nga matapna ang paglapta sang coronavirus disease(COVID-19) matapos nga malista ang pinakauna nga kaso sang positibo sa COVID 19 halin sa amo nga banwa.
Suno kay Jamindan Mayor Mac Valdemar, ginpaidalom na sa extreme enhanced community quarantine ang barangay kun sa diin naghalin ang persona nga nagpositibo sa virus.
Ini sa subong ang gina-classify bilang RED ZONE AREA kun sa diin hugot nga gina-implementar ang home quarantine nga buot silingon ang tanan nga mga residente ang ginabawalan nga magguha sa ila poluy-an.
Suspended man ang tanan nga sahe sang transportasyon. Ginadumili ang pagbyahe sang public utility bus, public utility jeepneys,tricycles, trisikad kag mga motorsiklo.
Ang tanan nga mga border ang dapat nga siradhan samtang may yara naman sang gindeploy nga mga kapulisan kag membro sang Philippine Army, BFP, CAFGU, personnel sang Jamindan Response Unit(JRU) kag mga barangay tanods.
Samtang ginkumpirmar ni Mayor Valdemar nga kasunod sang amo nga report sang positive case, insigida sini nga ginmando sa Municipal Health Officer sang Jamindan ang maid-id nga contact tracing sa pamilya, abyan kag iban pa nga naka-upod sang amo nga pasyente.
Ginkadismaya naman sang alkalde ang ginahimo nga pagpalapta sang sala nga mga impormasyon sang publiko. Iya nga ginkumpirmar nga yara sa stable nga kondisyon sang 45-anyos nga lalaki nga positibo sa CoVID-19. Ini subong ang ginatatap na sa isa ka ospital sa syudad sang Iloilo.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
