General Santos City–Gikumperma ni Barangay San Isidro kapitan Jeprox Yumang nga nagdeklara sila ug state of calamity sa ilahang barangay gumikan sa taas nga ihap sa mga taga Barangay San Isidro nga nataptan sa dengue. Sumala pa ni Kapitan Yumang nga human nga nagdeklara ang syudad ug State Of Calamity nag pahigayon gilayon sila ug special session aron nga mapa ilawom sa state of calamity ang Barangay San Isidro.
Sa tumong nga magamit nila ang parti sa ilang disaster fund sa pagsumpo sa Dengue sa ilang Barangay.
Pinaagi matud pa sa maong pundo makapalit sila ug mga kemikal ug mga gamit aron nga maadtuan ang pinakaapektado nga mga purok ug gilayong mapatay ang mga lamok nga nagdala ug dengue.
Sa barangay San Isidro ang Prk Masunurin; Prk Lower Matibay; Prk Kaunlaran; ug Prk Isabella Homes ang maoy pinakaapektado nga lugar gumikan sa dengue.
Gipa klaro usab ni Kapitan Yumang nga ang Barangay San Isidro ang ika-upat lang sa may pinakadaghan nga kaso sa dengue sa syudad apan aron nga dili na matud pa mudaghan ang mga biktima niini ilaha na gilayon kining himuan ug aksyon.
Nasayran nga ang Barangay San Isidro ang nakatala ug 14 ka mga kaso sa Dengue. (Dave Silagan)
